XAVIEL VILAREYO

Comentarios(4) »

1. xaviel vilareyo 23-11-2007 - 17:49:24 GMT 0

   LA MEMORIA

   Hai una piedra llantada nun astórdigu llugar.
   Hai otros fíos fuera de la casa y Tierra.
   Hai una llinia entá ensin trazar.
   Hai un pueblu emborniáu nes viesques,
   onde les piedres escuchen de lloñe los recuerdos,
   onde dalgién cuntó una vieya hestoria,
   onde dalguién escribió de la mar.
   Esto yérase una vegada un rei
   que cuando morrió lu soterraron nuna cueva.
   Había una vegada una xana que baillaba
   y un gran Cuélebre que gufaba.
   Y una madre que nun paraba de llorar.
   Bendita la reina la nuestra Montaña
   que tien por tronu la tierra asturiana.
   Nun-yos repitas lo que fuimos,
   o lo que somos y sedremos.
   Nun nos escaezas nada que nos fixo
   sentir, ver o tastiar tan a gustu
   esi cachu, el más guapu y benditu
   del sele esistir de nuestro
   qu’amorosiego nos alluma.

   Xaviel Vilareyo

   -------------------------------------------

   TRESVISU

   Una vegada dixi yo Tierra,
   y descubrí un trozu d’optimismu indescifrable,
   un cachu de máxicos soníos,
   d’aire fresco y tastu candial.
   Una vegada güeyábase too bien cerca:
   El valle sonce, el H.itu d’Escarandi
   y la H.orcadura del Cantu
   que forfuga namás vela.
   Un cachu más d’Udrión, La Bargoña
   y el H.ondu Valdediezme per embaxo,
   como chocándonos los cinco.
   Y entrambos dos collaos, reconocí esta tierra.
   Una vegada, en Tresvisu, dixi Asturies
   y nengún escuchó lo que dicía.
   Solamente aquella tierra tan sollerte,
   y tan solu nella.

   Xaviel Vilareyo

   ---------------------------------------------

   POPULAR

   Xuan d’Antona y Teresina Mier
   Fíos de la mesma Tierra madre.
   El mio corazón allegre
   de pena llenu llevo.
   Pa L’Habana marcha’l pequenu Xuan
   cola promesa de tornar un día.
   Adiós borrina, adiós cumal.

   Y toles canciones que pudo remembrar
   yeren de los verdes montes
   Y de la vieya mar.

   El so corazón llenu de señaldá que mata.

   Que toles canciones que pudo remembrar
   yeren de los verdes montes
   y de la guapa, guapa mar.

   Xaviel Vilareyo

   ----------------------------------------------

   CÉLTICA

   Mirái les altes cumes de Cornión
   cómo s’esmucen baxo’l cielu
   como barcos xigantes na nortiada,
   na mar tan verde como’l nuestru corazón,
   el nuestru aliendu esperanzáu.
   Dexáinos sentir nel silenciu señaldosu
   la hestoria que nos cuente’l vientu
   de la xana que de pena morrió
   en secando la fonte que curiaba.
   De les llárimes qu’ella lloró
   un carbayu medró al pie la fonte.
   Que nuna lluna de Mayu
   esmoreció tou de murnia
   pues la fonte santa enxamás resurdió.

   Xaviel Vilareyo

2. xaviel+vilareyo 23-11-2007 - 17:53:04 GMT 0

   EL MEYOR TIEMPU

   Sona una gaita,
   vamos ver al gaiteru pasar.
   Parroquianos al velu
   de ventana y tayuelu
   amiyen y entamen baillar.
   Toca, gaiteru,
   toca agudo esa pieza al cantar.
   Y llega contento la reciella
   qu’el tambor tamién quieren tocar.
   Da-y al Són, a la media,
   ente vueltes y zancadiecha,
   enriba les manes xirando,
   xirandiya, sudu, pandeiru,
   que la xente nun va cansar.
   Toca la Danza,
   la qu’allegra y nos da señaldá,
   qu’esi fueye nun pare d’alendar.
   Da-y a la gaita, gaiteru,
   que la gaita restinxa hasta’l mar,
   qu’el cielu y les ñubes,
   dexen a la lluna dar llume,
   qu’el Nuberu nos dexe baillar.
   Y no alto, les cumbries
   que la mar acollumbren,
   recortándonos la mirada,
   amatagándose adulces,
   fundiendo les solombres
   como nun mar d’escuridá.
   Y nos cielos qu’anubren
   párense les ñubes
   nel so nidiu entainar
   como diciéndo-y al vientu
   que d’ellí nun quieren marchar.
   Resuenen los sones
   cuesta arriba p’enriba van,
   que d’enriba y d’embaxu
   baxa y xube la xente apurriendo
   botielles, bollos, casadielles,
   que van pal campu la ilesia,
   pa escanciar pol santu y brindar.
   Vienen moces y mozos pela carretera,
   y restalla un cuete anunciando
   que va comenzar llueu la orquesta.
   Intuyo les rises de lloñe,
   y los más gayaspeiros collores
   de la mio bendita Tierra,
   porque allá nel fondu, fondu valle,
   prendieron yá el prau la fiesta.

3. xaviel+vilareyo 23-11-2007 - 17:54:39 GMT 0

   SAYAMBRE

   Oseya, augua del Seya,
   augua saliente, xorreciente,
   manancial frescu, fontayos,
   faya, carbayu, fayéu, foyacos,
   potentilla astúrica, valeriana,
   mariselva, miruéndanu,
   robezu y urogallu.
   Oseya, xana del Seya,
   Pontón, puerta de la tierra,
   acollumbrando l’alta mar,
   zalaburdiando pelos picos,
   sotu a sotu, puertu a puertu,
   xubí al puertu de la mar,
   a la lluz del día, la mar fonda.
   Y sentí la tierra xeneroso,
   l’aire de la mar salao,
   Zalambral, Los Beyos, Ribota,
   na antoxana de Les Asturies,
   na llende del Foranu,
   a la solombra del Seya.
   Y mirando pa la borrina
   vi a Sayambre afayadizu
   otra vez na so tierra entera.

   Xaviel Vilareyo

4. xaviel+vilareyo 23-11-2007 - 17:57:57 GMT 0

   Cuando’l marmiellu venía en caxes de madera

   Dicen que la lliteratura tamién vive de los suvenirs, de los recuerdos, de les memories. Delles veces, sobre too cuando nun tenemos abonda imaxinación pa camentar los fechos, solemos recurrir a ellos pa escribir. Al ratín d’entrar nel muséu nacional vimos unos cuadros d’unos monxos con calavories. Yeren hespañoles, por supuesto, los monxos y los pintores, el cuadru nun lu yera y les calavories a saber de ónde. El casu ye que yera vezu na Hespaña fanática, llaceriosa y cafiante del sieglu XVII que los artistes pintaren a los santos con güesos de calavories humanes, como pretestu de reflexión y pensamientu. Daquella tocaba pensar na vanalidá de la vida na tierra y na superioridá de la vida nel otru mundu, nel mundu los muertos. San Capuchín con farrapos meditando nunca cuevona metanes l’ermu. Guapu títulu pa una pintura de la Galería Nacional. Guapu personaxe sedría güei San Capuchín, si algunu viviera asemeyao, pa sacalu nuna entrevista millonaria nun horariu de máxima audiencia televisiva, por raru y contracultural. Na casa la reina había mangáu otru cuadru buxu de los barcos de l’Armada Invencible navegando pel Canal de La Manga con más cures y monxos que soldaos, otru xeitu mui inglés de reíse de los fanáticos y católicos hespañoles d’aquel rellumante sieglu nel que los que mandaben mandaron. Depués de too, ¿por qué nun diba haber cures nes guerres de relixón?. Quiziabes por excesu d’ellos Hespaña perdió toles guerres d’entós p’acá, inclusu la del 36 pero esto ye abondo dicir.

   N’Inglaterra, una muyer acaba parir a los cincuenta años, que se diz pronto y tarde. Por supuesto qu’esto ye más creíble que los aburríos mitos cristianos de vírxenes pariendo ensin inseminación de varón, cosa que munchos creen y tienen tola llibertá del mundu terrenal pa creyelo. Muyeres pariendo fíos y fíes ensin necesidá de varones, qué guapo suena y qué lliberación pa la causa femenina, como quitase un pesu d’enriba, vamos. Sedría como vivir con un ser clónicu que nos echara un gabitu na xera diaria de la vida, qué gran avance. Nes ilesies anglicanes nun esisten imáxenes de la virxe que parió un dios, anque la verdá poques imáxenes tienen d’otros santos. Una palabra val más que mil imáxenes, esa ye la doctrina. Cada vegada hai más persones que nos allistamos a esta frase, creo yo. Por que na dómina del píxel y del fotoxot lo único creíble, lo único que nos queda incincable, virxen, sagráu, ye precisamente esto que vos cuento, la palabra. Pero eso sí, una palabra bien dicha, que quede bien claro.

   Según la llei de la gravedá dos oxetos exercen una atracción ún sobre l’otru d’igual valor y dirección opuesta. Había unes coles tremendes de xente esperando pa entrar na Abadía de Westminster. Tolos díes igual. Qué fastidiu. Qué negociu. Quince euros la entrada. Nun ye normal esa atracción de la xente por ver la tumba de Newton y non la de Haendel, Faraday o Dickens. Nuevos tiempos, nuevos vezos, nuevos fans.

   La llei de la gravedá inventóse n’Inglaterra, como tol mundu sabe, pero tamién la dinamo, la máquina de vapor, el cheque y el capitalismu popular. En Francia creóse’l bidé, el xampán y el paté, ente otros refinamientos varios. Hespaña inventó la guitarra, la guerrilla, la llingua asturiana, la catalana y la fregona, que como’l castellanu temién tien relación cola llei de la gravedá pol grave estrozu que fai coles llingües que quier barrer d’un fregonazu impositivu. Menos mal que’n Londres puedo recibir información de la Cámara de los Comunes y de los teléfonos en galés, ye como si lo lleera na llingua del principáu, señaldosamente.

   La primer vez que llegamos a Londres yera tamién branu y entá llevábemos mio ma y yo nel monederu les pesetes cola cara dura de Franco, aquella que por muncho que-y apretares los güeyos nunca dicía ai. Yera raro, más bien exótico pa unos guajes como nosotros tocar la cápsula del Apolo XI nel muséu de ciencies o goler la xaula de los monos d’un zoo. Tamién recuerdo la primer foto que me dexó mio madre facer con aquella Yassica suya al paecer tan cara y que pesaba como dos quilos: los soldadinos colloraros del gorru pergrande enfrente de Buckingham, que la hache nun se pronuncia en Londres, esto ye, que ye muda igual que los soldaos colloraos. Cerca del pueblu de Churcill, que tenía nome de cigarru anque fumara puros, fuimos visitar la so tumba naquel campusantu, tan pequenu y tou estráu de florines y llueu la casa de Shakespeare en Stratford que vien del llatin estrada, palabra que n’asturianu significa como bien sabéis esparramadada pel suelu, igual que la lápida de Sir Winston. En Windsor nun facía gota d’aire pero aquellos orbayos d’esmenu parecíen venir toos d’Asturies. Como díbemos d’excursión cola parroquia siempre visitábemos llugares santos, como ilesies, el llugar onde mataron al arzobispu Thomas Becket por ser más fan del papa que del rei, y ver esa paz de los conventos, esa sele quietú de les tumbes... por eso fuimos toos ver Xesucristu Superstar nel teatru Palace, pol morbu que daba a los católicos, o seya a nosotros, el besu con María Madalena, que como agora tol mundu sabe agora yera la so muyer. Cómo camuda too. Y qué poco duren agora los políticos nos cargos, dalgo vamos avanzando. Pero tábemos en Londres, nesi Londres que nos primeros años setenta yera la meca, perdón, quiero dicir, el centru de la modernidá y el llibertinaxe, con democracia y too.... Londres ye l’amestáu de lo más tradicional y lo más moderno. El Palace ye un vieyu teatru de la dómina victoriana fechu con eses fachades de terracota marrón claro, collor mierda más bien dicho, tán típiques d’esta arquitectura y que queríen remembrar, valga la palabra, los palacios renacentistes de la etapa Tudor inglesa, tan querida polos victorianos. Los victorianos yeren unos seres visionarios, hipócrites por supuesto, pero que pretendíen entamar una arquitectura nacional británica inspirada nel góticu tardíu. La reina Victoria yera pequena y tenía una corona pequena fecha pa la tiesta suya. El maríu y primu carnal d’ella que se llamaba Albert yera abondu más corpudu y llevaba un aniellu inxertáu na punta del pene, sí, nun vos reir que ye cierto. Cuando Albert morrió, Victoria enxamás soltó el llutu hasta’l fin de los sos sospiros y mandó face-y una estatua xigante en Hyde Park, pero vestíu de cabu a rau, non desnudu como solíen esculpise dalgunos emperadores romanos.

   La tiesta del emperador Hadrianu llabrábase siempre con barba y con guedeyes rizoses. La tiesta d´Antinoo lleva una corona de fueyes y garrapiellos d´uves, como´l dios Bacu. Ye raro qu’esistan güei tantos bustos d’Hadrianu enteros cuando a esti monarca comparábenlu entós col maléficu Nerón. Según la tradición romana, los emperadores crueles, en morriendo habríen padecer la venganza de los súbditos col frañamientu, estrozu y destrucción de tolos sos bustos, estatues o efixies. Hadrianu camentó que’l so amante Antinoo lu sucediera como emperador pa que polo menos curiara de la so memoria, pero Antinoo morrió antes qu’Adrianu. Por ello fizo por qu´un senador lu sucediera pa compensar los graves conflictos que tuviera col senáu de Roma dende había tiempu. Hadrianu admiraba la cultura griega y creo que´l meyor xeitu de recordar a esti emperador béticu nacíu n´Itálica nel bierzu d´una familia de colonos romanos ye escribir el so nome con hache mayúscula, esa hache que siguen pronunciando los ingleses y dellos asturianos. La muria d´Hadrianu separtaba Inglaterra d´Escocia y ya nun lo fai porque toa ella ta en territoriu guei día inglés. Si d´Hadrianu dependiera, los frisos del Partenón tornaríen a Grecia, de xuru.

   Dende la dómina del imperiu romanu, gobernando Claudio, Londres yá yera una ciudá importante, gracies al puertu natural qu'esfrutaba cola so impresionante y sele ría, la del Támesis o Zams. Inda nomando a esta ciudá con un términu celta: Londinium, los autóctonos considerabenla como una colonia foriata y enemiga. Por ello los romanos arrodiaron Londinium con una gran muria, qu'algamaba lo que güei ye la City, y de la qu'indagüei queden nicios bien güeyables. Diendo pela cai de London wall atopamos con ún de los museos más pretosos nos que podéis afayavos: el Muséu de Londres. Ye un sitiu fabulosu por si queréis inspiravos na historia y escribir hestories nueves ya interesantes. Por exemplu, ellí podéis saber más de la reina celta Budica, la que lluchó contra los invasores romanos atacando Londinium hasta perder la vida, y tamién llueu podéis facevos semeyes nel monumentu que-y dedicaron énte la torre del Big Ben, como si d'una trunfadora se tratara. Diez puntos pal Reinu Xuníu. Anque nun entamu Colchester yera la capital de Britania, bien llueu los romanos ficieron de Londinium una bayurosa y gran ciudá. La so basílica yera la más grande al norte de los Alpes. Agora la catedral de San Pablu ye la segunda más grande del mundu. Nueve puntos pal Reinu Xuníu. Anque nel sieglu sextu la ciudá parez abandonada polos romanos, son los nuevos invasores saxones los que s'instalen nella fundando nel añu 604 la primer catedral de San Pablu. Los saxones llámenla Ludenwick. Cuando Pelayu yera rei de los ástures, nestes tierres reinaba otru monarca, Ine, rei de Wessex, al llau d'un garrapiellu de pequenos reinos. La conquista normanda nel sieglu once, llueu de la batalla de Hastings contra los saxones nel añu 1066 afita la capitalidá de Londres. William el Conquistador, primer rei normandu, mandó facer la torre de Londres, la torre blanca, la torre de los cuervos. Dende entós, los reis yá d'Inglaterra nun marcharán de Londres a nun ser pa dir al so palaciu de Westmister. Los republicanos quieren envelenar a los cuervos de la torre porque según una tradición, ya Inglaterra ye un país mui tradicional pa estes coses, si los cuervos marchen de la torre acábase la monarquía británica.

   En Londres nun se pronuncia la hache, esto quier dicir que les haches ante vocal son mudes. Tamién tienen una tendencia a abrir más de lo normal les vocales. Tracamundien la zeta pola efe, y naide pronuncia la te intervocálica. La te final nun esiste polo tanto ye lo mesmo un tique qu'un ticket. La lletra a ya nun ye la lletra a, pronúncienla como un quexúmene: ai. Son inda más irónicos que los asturianos y camuden palabres por otres que rimen como ella. Por exemplu ye como si en llugar de dicir que-yos tocó'l premiu gordu diríen que-yos tocó'l premiu Areces. Son prestosos y mui llistos, como los vendedores ambulantes del Soho, que falen con llabia esti cocnei, la llingua de Londres. La xefa del estáu, Isabel II, fala un inglés tan marcianu que naide nun sabe catalogalu per nenyures; la llingua d'ella, que dicen heredó de la reina Victoria, y ésta heredó de los alemanes, forma un dialectu aparte que se conoz como l'inglés de la reina. El maríu de la reina Victoria tenía un aniellu de metal espetáu na punta del pene, cuando morrió él, mandó que toos llevaren llutu nel palaciu como ella pel restu la so vida. Hai que fastidiase y cola cantidá d'años que vivió la victoriana.

   Los victorianos yeren una xente increíble. Sentíen pasión pola Edá Mediana, yeren góticos mui tardíos. Consideraben la hipocresía una virtú más que'un viciu. Y penriba too yeren nacionalistes británicos, dar serviciu a la patria yera'l so mayor arguyu. Un maríu victorianu llevantábase davezu normalmente a les cinco y media la mañana y llavábase la cara nuna palangana con agua frío que tenía nel cuartu de dormir y darréu vistíase pa dir a trabayar. Baxaba pa la cocina onde la muyer victoriana yá-y tenía iguáu l'almuerzu de té calentino con pan, manteca y marmiellu, tocín o embutíos. El maríu victorianu marcha pa trabayar andando si la fábrica-y queda cerca, esto ye, a dos milles de distancia o va espatuxando cola bicicleta si la fábrica tá inda más lloñe. Lo güai ye trabayar nuna fábrica textil yá que nun contamina demasiao y pues llegar a vieyu trabayando nella pues les fábriques victorianes nunca piesllen, nelles siempre hai trabayu y tou un imperiu pa exportar. El maríu victorianu llega a casa a eso de les seis de la tarde si nun paró a tomar daqué nun bar públicu y llega tan frayáu y la casa arreciende a pan turrao, bizcochu y galletes que sólo tien ganes de cenar darréu la carne cocío con cebolla, zenahoria y pataca y deitase a descansar o siacasu enllenar los quinqués pa qu'allumen más tiempu. La muyer victoriana ye siempre mui bona cocinera, gastrónoma como diz agora la televisión. Llevántase bien ceo a les cuatro y media la mañana, esto ye, una hora antes que'l maríu victorianu, cuando inda ye de nueche, pa poder igua-y al maríu l'almuerzu, cebar a les pites de casa, preparar la tetera y entamar la llimpieza xeneral de la cocina. Facer la colada, esto ye llavar la ropa, lleva tola mañana y sobre too hai qu'esfregar abondo bien y con enerxía los pescuezos de les camises blanques, nun vaya ser que digan que son unos sucios. Mentantu la muyer victoriana va al mercáu y fai una visita a les collacies de la hermandá de la ilesia, una moza victoriana vien a trabayar a la casa al mediudía pa echa-y una mano a la muyer victoriana cola llimpieza de los cuartos, l'enxugáu y plancháu del roperíu y l'entamu de la cena. La muyer victoriana apúrre-y la xinta tolos díes a les doce en puntu al maríu a la fábrica. Too tien que tar bien llimpio, iguao y a xeitu pa les seis de la tarde que ye cuando llega'l maríu victorianu. El fíu victorianu llevántase a eso de les seis y media de la mañana o más tarde y n'almorzando marcha pa la escuela de la fábrica pa los fíos de los obreros de la fábrica onde-y enseñen llectura, escritura, aritmética, historia, xeografía y ciencies y tamién deprende cómo furrulen les máquines de la mesma fábrica. En tornando de la escuela xuega na cai a les caniques o a la escondidiella colos amigos victorianos. La familia media victoriana vive nuna casina adosada con xardinucu propiedá de la fábrica a la que-y paguen una renta y anque dexe'l trabayu podrá seguir col arriendu. La familia victoriana paga una pequena cantidá de dineru a la escuela de la fábrica pola educación del fíu victorianu. La fía victoriana llevántase a eso de les cinco y media la mañana, igual que'l padre victorianu, pa poder asina ayudar a so madre a da-y l'almuerzu na mesa al padre victorianu, llueu d'almorzar marcha trabayar d'operaria a otra fábrica textil onde manexa una máquina que fai duviellos de filos de collores. La familia victoriana cobra dos sueldos los vienres, por eso pue cenar carne o pescáu tolos díes, y los fines de selmana suel quedase en casa los sábados pela tarde. Los domingos vístense elegante, van a misa, lleen el periódicu, salen a pescar, al rugby o de visita a casa de dalgún pariente.

   Ye fácil entender por qué en Londres cuasi too tien relación cola etapa victoriana. Hai tanto que remembra la reina que más tiempu duró nel tronu que paez que más qu'una hubiere vente reines con esi nome. Nesta dómina Londres convirtióse na ciudá más grande ya industrial del mundu ya Inglaterra, la nación más poderosa, tiesta d'un imperiu qu'algamaba los cinco continentes dende la probe irlanda hasta la fabulosa India y la llonxana Nueva Zelanda. Cola revolución industrial Inglaterra dexó de ser un país de campesinos y aristócrates y camudó nuna nación de clases obreres y d'empresarios, de grandes ciudaes con fábriques. Hacia 1850 Inglaterra creó la clase media y los trenes con vagones de primera, segunda y tercer categoría. Toos podíen viaxar en primera si algamaben a pagar pa ello anque col tiempu los ricos ficiéronse inda más ricos, igual que'n tolos llaos. Entós esti país tenía políticos decimonónicos que dicíen que l'esfuerzu individual xunto cola austeridá y l'aforru podíen llevar a cualesquier individu del cualesquier orixe al éxitu y a la bayura. Pa los victorianos emborrachase y sobre too practicar sexu fuera del matrimoniu taba mui mui mal visto sobre too nes muyeres. ¿Acasu taba ello bien mirao naquella dómina notros países?.

   Lo meyor que dexaron los victorianos y victorianes en Londres creo que ye l'arquitectura, el so románticu sentíu de la construcción. Construyeron nun estilu neogóticu inglés les Cases del Parlamentu que rellumen nidio como l'oru nos llongos atapeceres más soleyeros del branu. Depués del incendiu del vieyu parlamentu había que facer otru nuevu y góticu, non por caprichu sinón pa que nun desentonaren con otros espacios góticos qu'ellí como nicios rellumaben per sieglos. La inmensa torre Victoria vese dende Primrose Hill, un colláu de les afueres onde cazaba osos Henrique octavu y qu'acertadamente nun suelen segar. La torre victoria ye alta, una ironía más dada la poca estatura de la reina, pero nun ye decorativa, sirve p'ablugar más o menos un millón y mediu de lleis aprobaes pol parlamentu dende'l sieglu quince. Cuando entramos na Cámara de los Comunes nun pudimos ver al amigu Tony Blair pero vimos a otru con peluca que se-y asemeyaba bastante. Ellí dientro enterámonos de cómo taben debatiendo una llei pa penalizar les ofenses raciales o relixoses.

   Tengo unos amigos cubanos que s'escoyonen de risa si digo que son de collor. - "De color, nada", -"Nosotro somo negro". En Londres hai abondos negros pero tamién hai muncha xente de color porque visten fatal. Hai mozes iranís qu'arrastren faldes llargues y prietes pero eso sí, bien ceñíes y con tacones. Hai etíopes que vienden llibros nuevos pero de saldu nuna llibrería de too a dos libres. Hai kurdos que fríen pataques a les dos de la mañana nuna cai céntrica y que da gustu atracase d'elles. Y tamién hai asturianos que tán de vacaciones viendo museos y que vinieron nun avión dende Valladolid qué se va facer. Como vos digo, qu'hai de toles naciones grandes y pequenes: una ciudá multicultural qu'amás tien muncha cultura.

   Nos parques de Londres nun ta prohibío pisar la herba. Inclusu podemos facer una romería nella, una xira, arrodiaos por esguiles y palombes esfamiaes que nun tarrecen a los humanos nin a les humanes. La herba de Londres ye más seco que la d´Asturies y si orbaya darréu enxuga. En Londres en realidá hai dos ciudaes estremaes. Una ye London, quiciabes la ciudá más guapa del mundu y la otra ciudá llámase Sáuak. La catedral de Sáuak salvóse del gran incendiu del 10 de setiembre de 1666 por alcontrase al otru llau del ríu. Les vidrieres de la catedral de Sáuak rellumen ente’l ruíu rinchante de los trenes que pasen al so costazu como esnalando. Sáuak ye una d'eses ciudaes nes que siempre quieres que l'autobús qu'esperes na parada llegue cuanto antes del puru mieu que t'entra en cuerpu. Sáuak ye una d'eses ciudaes onde la xente nunca sal a pasear. Sáuak ye una d'eses ciudaes onde siempre tienes un tren pasando penriba la to tiesta y esperando que nun descarrile. Sáuak ye como unu d'esos inmensos polígonos industriales onde tolos políticos quieren recalificar terrenos pa da-y un pocu de vidina al asuntu y ponelos de moda a base de facer lofts y más lofts y llenalo too de bares gais pa ver si asina s'anima l'actividá comercial y sube de pasu´l preciu del metru cuadráu o de la yarda o de les dos coses al empar. Sáuak ye una d'eses ciudaes que necesita a glayíos una película pa ponela de moda y que suba'l preciu de los inmuebles. Sáuak ye como Berlín ensin museos nin salchiches. Sáuak (escrito Southwark) ye esa ciudá na que nos prestaría nacer pa poder cruzar el Támesis y emigrar a Londres. Pero esto ye otra fata lleenda urbana qu'agora nun quiero contar. Falando de lleendes contaré una bastante cierta, por ciertu, y ye que'n Sáuak una vegada vivió una infanta de Castiella que'n morriendo nun dexó más que'l so títulu nel llugar nel que vivió y como la xente de Sáuak nun sabía qué diantre yera una infanta de Castiella entamaron a nomar al llugar "elefante y castiellu" y asina toos sabíen aónde diben y de qué sitiu veníen. Como los autobuses colloraos que siempre sabemos aónde van. El 521 va a la estación de Waterloo, otra victoria inglesa, y pasa pel Strand, como´l quince, el queríu autobús quince que vien de la Torre de Londres y que ye l´únicu qu´inda lleva bombín antigu y ventanines abiertes. El Strand ye la cai mayor de London dende la Edá Mediana. Al Strand siempre diba Sherlock Holmes a ligar pero nunca sabemos con quién ligaba porque siempre diba col so amigu Watson. Inda queden teatros nel Strand, resistiendo

   Inglaterra y Asturies son países d'empanades. La primer nación faila de reñiles y la segunda de calamares en so tinta. Hai que ser orixinales. El vinu n´Inglaterra siempre foi una bebida exótico. La bebida nacional y llariega siempre foi la xinebra, anque agora la más popular ye la cerveza. Los más nacionalistes quéxense qu´Inglaterra ya nun ye Inglaterra dende que la xente consume más cafés que tés, un vezu ésti de tomar té pa dos a toles hores, prácticamente inglés. N’Asturies cuasi naide bebe té porque equí ye permalu y tastia mal, pero en Londres el té sabe qu’alimenta y arreciende a cien sabores diferentes.

   Como toles ciudaes vives, Londres ye un sitiu que siempre camuda. Aquel sitiu qu'un añu taba tan de moda al otru añu ta peslláu con un cartel de "pa dexar". Hai qu’informase en llegando de tolo que se cuez na gran ciudá. La mole del edificiu del M16, el serviciu secretu británicu, protexe la nueva zona gai de Londres: Vauxhall, que antes conocíemos sólo por unos vieyos grabaos del sieglu XVII qu’amosaben los sos famosos xardinos reales. Les autoridaes locales saben que los empresarios gais tienen la rara maña de camudar un barriu deprimíu notru piju y de moda, asina que tolos gais pa Vauxhall que de la que van o vuelven pa ligar igual-yos apetez mercar una antigüedá o una ropa de marca, por poner, y asina aumentamos les plusvalíes del terrén. De momentu nengún famosu vive en Vauxhall pero al platu vendrás arbeyu.

   Préstenme estes nueches tan prietes de Londres, caleyar cuatro minutinos hasta la parada del bus más cercana, con esos faroles como güeyos apigazaos qu’allumen malpenes los tos pasos y esa sensación de soledá en sintiendo namás que los tos pies entainando nel pavimentu como baltos del corazón que t’emburria hacia una nueva aventura quizá. Hasta que dobles la esquina y atopes una fola de xente faciendo cola a les tantes pa mercar un cucuruchu de patates frites, les más riques del mundu diría y por dos monedes. Eso ye Londres, un muséu vivu de contrastes a cada esquina, en cada recantu, a cada pasu.

   Los árboles de Grínich dicen que los llantó Isabel primera y qu’inda lloren l’ausencia de la reina, una reina caleyera que-y prestaba viaxar siempre pel país. L’actual reina ye llaregona y nun-y gusta nada salir de casa nin siquiera a sacar de paséu a dalgunu d’esa llarada de perros que tien siempre pisando alfombres. Del vieyu palaciu de Placentia sólo queda’l recuerdu de la solombra en movimientu de les naves llegando y marchando del Támesis. Pero l’arume de quietú d’esti ríu debió ser otru de más xaréu non hai muncho atrás cuando too llegaba y salía pela mar de los milenta barcos. El meridianu cero había tar en París pero quedó en Grínich por mor de les maldaes y nepotismos de Napoleón, esa manía suya y tan italiana de dar cargos a los sos parientes. Los románticos canales de Londres facíen antañu de víes de comunicación ente’l puertu y el restu d’Inglaterra. Angüañu nun son más qu’un requexu de paz interior y d’exotismu melancólicu pa los paseos de los turistes y d’algún vieyu progre que vive nalguna barcaza apiegada a los vieyos cais y alloñáu del mundu y de la humedá.

   Les nubes grises tapecen d´esmenu el guapu cielu azul del branu de Londres y como nun suañu, de sópitu alcontrámonos na mesma borrasca d´Asturies, nel mesmu aire frescu que nos empapa de señardá cuando marcha y sal el sol otra vegada, otru intre, otra gueyada inesperada al horizonte borrinosu que vien de la mar, de toles mares fríes y endolcantes del recuerdu.

   La estatua de Sherlock Holmes ye difícil d’atopar. Hai qu’entrugar por ella. Woolwich, Paddington, Whitechapel, Aldgate, Farringdon... son nomes que lleímos cien vegaes y que vemos agora baxo les nueses frayaes piernes. Mereció la pena esgotase pa sentir tou esti abandonu, escuridá y negritú de los vieyos barrios portuarios ya industriales, escenarios de vieyos y famosos crímenes novelaos y qu’agora intenten poner de moda a base de prestosos “lofts” apartamentinos baratos pa xento mozo y dispuesto a vivir ellí onde Jack el Triperu fizo de les suyes. Cunten en Whitechapel que Jack, Santi, yera un miembru de la familia real británica que follaba y llueu mataba más que nada pol que diríen, pragmatismu flemáticu típicu inglés, camentaréis, en fin, otru argumentu pa un nuevu relatu.

   Al otru día, baxamos tamién pa la plaza Trafalgar. Nel momentu en qu’aportamos otra vegada a la Galería Nacional, ye que ye gratis..., tampoco había coles de xente, pa dientro entós, vemos dos o trés sales y salimos tomar un té perende. Esta vegada llamóme l’atención una caxina pequena de madera pintada nun cuadru, nun bodegón pa ser exactu. Yera una d’aquelles caxes de marmiellu como les que compraben mios padres cuantayá y que dexaron de vese nes tiendes y nos supermercaos porque facer aquelles caxes de madera llegaba a costar más que facer el propiu marmiellu. Gueyando, gueyando miré de quién podía ser aquel bodegón tan familiar. Entós llamé a Ben y díxe-y:

   - Mira, Ben, los Meléndez yeren toos pintores y yeren toos d’Uviéu y falaben toos asturianu.
   - Mmm – dixo Ben- Gorgeous!. How do you say “gorgeous” in asturian, then?
   - N’asturianu normativu dizse “perprestoso” pero nosotros dicimos “de puta madre” que ye más fácil.
   - Then, you don’t speak very normal...
   - Supongo que caún fala como ye.

   Y salimos del muséu pa tomar un té y una xinebra nel pub más cercanu mentantu les pintures de la sala, esmucíes nun lentu zoom, alloñábense pasín a pasu nel mio regüeyu.

Dexar un comentariu